တကိုယ်ရေလွမ်းဆွတ်မှု
အထီးကျန်ကမ္ဘာထဲမှာ
အသိုက်အမြုံ ပျက်ခဲ့ရသူ
တွယ်ရာမဲ့လွင့်မျော
ဘ၀အမောများစွာ
ခိုလှုံရာ ရှာမတွေ့ခဲ့ဘူး ။
အဲဒီ
ဒုက္ခမီးတွေကို ငြိမ်းသတ်ဘို့
ကံကြမ္မာရေ
ကောင်းမွန်လှပတဲ့ နေ့ရက်များ
ငါ့အတွက်
လက်ကျန်မရှိတော့ဘူးလား ။
အခုတော့
မင်းအတွက်လား
ငါ့အတွက်လား
မသိနိုင်အောင်ကိုပဲ
ထိုးနှက်ချက်တွေက
ပြင်းထန်လွန်းလှချည်ရဲ့၊
မင်းကို သနားရမှာလား
ငါ့ကိုယ်ငါ သနားရမှာလား
ထိုးနှက်ချက်တွေက
ရက်စက်လွန်းလှချည်ရဲ့ ၊
မင်းကိုစွန့်ပစ်လိုက်ရမှာလား
ငါ့ကိုယ်ငါ ဇာတ်သိမ်းလိုက်ရမှာလား
ထိုးနှက်ချက်တွေက
ကြေကွဲဘွယ်ကောင်းလှချည်ရဲ့ ။
ကြောင်ခံတွင်းပျက်နဲ့
ဇရက်တောင်ပံကျိုး ဆိုစကား
(လူတွေများ အမနာပ ပြောရက်ကြတယ်)
ရာဇ၀င်အသိုးထဲမှာ
ကဲ့ရက်ခုနှစ်ရက် ချီးမွှမ်းခုနှစ်ရက်နဲ့
ရောနှောထားရစ်ခဲ့
တို့နှစ်ဦးဟာ
ရေပေးသူနဲ့ ရေငတ်သူ
တွေ့ကြတဲ့သဘောသာပ ။
ဘာပဲဖြစ်ဖြစ်
ငါ့ ဘ၀ကို ငါချစ်နေသမျှ ကာလပတ်လုံး
အတောမသတ်နိုင်အောင် လောင်ကျွမ်းနေတဲ့
ငါ့ရဲ့ ဒုက္ခမီးက
အဆုံးသတ်မသွားဘူး ။
မောင်လွမ်းမှိူင်း
No comments:
Post a Comment