ညီမလေး …. ငါတို့ ရဲ့ ရာဇ၀င်တွေရိုင်းခဲ့
ဖြတ်သန်းခဲ့တဲ့လမ်း
ဖြတ်သန်းနေဆဲလမ်းမှာ
နှလုံးသားက
ဦးနှောက်ထက် ကြီးနေမှတော့
ဒီ ဘ၀ … ဒီ သံသရာ
ဆန္ဒ နဲ့  ဘ၀ တထပ်ထဲ မကျခဲ့သမျှ
ညီမလေးရေ ….
ငါ့ကို ခွင့်လွှတ်ပါလေဦး …..။
အစဉ်အလာဆိုတဲ့ ဥခွံထဲက
ဖောက်ထွက်ချင်ခဲ့ကြသူတွေပါ
အတ္တတွေနဲ့  စီးချင်းထိုးတဲ့အခါ
ငါတို့ တတွေမှာ တကယ့်ကို
အလဲလဲ အပြိုပြို ဖြစ်လို့ 
ညီမလေးရေ ….
ရာသီဥတုတွေတောင်မှ
ငါတို့ ဘက်မှာ မရှိတော့တဲ့အဆုံး …..။
အလွမ်း အဆွေးဓာတ်အခံနဲ့ 
ငါ့  ရင်ထဲက ပြဇာတ်များ
ကပြခွင့် မရမှတော့
ဆည်းဆာချိန် နေ၀င်အလှဟာ
ဘ၀ကို အနည်မကျစေတော့ဘူးကွဲ့ 
ညီမလေးရဲ့  ….
ငါ့ အတွက်တော့ နာကျည်းစရာ
မုန်တိုင်းရက်တွေက များလှခဲ့ပေါ့ …..။
အဲဒီလိုပါပဲ …ဧရာဝတီခမျာ
စီးဆင်းခဲ့တဲ့ လမ်းမှာ
ရာဇ၀င်များကို ဖြတ်သန်း
သမိုင်းခေတ်တွေကို ဖြတ်သန်း
ကြုံတွေ့ ရတဲ့ သွေးအလိမ်းလိမ်းဇာတ်လမ်းများ
အမိမြေ လွတ်မြောက်ရေးအတွက် ပြန်ပြောင်းပြောပြ
ညီမလေးရေ …..
တော်လှန်ရေးကာလက ရှည်လျားခဲ့ပြီပဲ …..။
အလင်းရောင်ပေးဘို့ အတွက်
ကိုယ့်ကိုယ်ကို စတေးခံရတဲ့ အဖြစ်မျိုး
အမေ … ဘယ်လို တန်ခိုးနဲ့ များ
ဖြတ်ကျော်နေခဲ့သလဲ
ညီမလေးရေ …..
ငါတို့ တတွေမှာတော့ ဦးခေါင်းကို
သဲမြေထဲ ၀ှက်ထားလို့ ကောင်းနေဆဲ …..။
ကမ္ဘာဦး လူသားတွေ
မီးကို မျှော်လင့်တောင့်တသလိုမျိုး
စွန့် လွှတ် စွန့် စား လမ်းဖောက်သွားသူများရဲ့ 
သမိုင်းထဲက ပြည်သူ ပြည်သူထဲက သမိုင်း
ဘယ်တော့မှ ရာဇ၀င်မရိုင်းဘူးဆိုပေမယ့်
ညီမလေးရေ …..
နှစ်ဆယ့်နှစ်နှစ် တာကာလ
ကျော်လွန်ခဲ့တာတောင်မှ
ငါတို့ ခေတ်မှာ ငါတို့ ရဲ့  အနာဂတ်ဟာ
မသေချာ မရေရာသေးတာကတော့ 
(ငါတို့ ကို ငါတို့  အပြစ်ဖွဲ့ )
ငါတို့  အတွက် ရာဇ၀င်ရိုင်းလှချည်ရဲ့  ….။
ရဲရင့်သက်ဇွဲ
၀၆၀၃၂၀၁၁
No comments:
Post a Comment