သံခဲတို့၊ သံဒုတ်တို့ နာမည်တွေကို ဖတ်ရ၊ ကြားရ တိုင်း သူတို့အဖေ ကိုစိုးဝင်းမောင်ကို သတိရမိတယ်။ “ဩော်--- သံခဲတို့အဖေ ကံနည်းလို့ သေရှာခဲ့ပါကော -- ” လို့လည်း စိတ်ထဲမှာ မြည်ကြွေးမိပါတယ်။ ထိုင်း-ဗမာ နယ်စပ် က သူပုန် လေးတွေနဲ့ ဖြစ်ကြတဲ့ သံခဲတို့ သံဒုတ်တို့ကို သွား ရောက်နှုတ် ဆက် အားပေးချင်တယ်ဆိုတာ စိတ်ထဲကပဲ ရှိပြီး သူတို့ဆီကို သွားမယ် သွားမယ်နဲ့ ကြံရွယ်နေခဲ့တာ ၅ နှစ်ကျော် ကြာခဲ့ ပါ ပြီ။ ကျနော် အမေရိကန်ပြည်ထောင်စုကို ရောက်ပြီး သူတို့ တတွေ နယ်စပ်မှာ ရှိနေကြတယ်လို့ ကြားကတည်း ကပါပဲ။
သံခဲကိုတော့ သူက ခရီးယာယီများသူမို့ ပြည်ပရောက် လေရာမှာ တွေ့ရတတ်ပါရဲ့။ သံဒုတ်ကိုတော့ ထိုင်းဗမာ နယ်စပ် မှာမို့ မသွားဖြစ် မတွေ့ဖြစ် ရသေးပါဘူး။ သူတို့ အဖေရဲ့ ဈာပန မှတ်တမ်းတိတ်ခွေကိုတော့ သူလူကြုံနဲ့ ပို့လိုက်လို့ ကြည့်ရ ပါတယ်။ ၂၀၀၀ ပြည့်နှစ်ဒီဇင်ဘာ ၁၇၊ အသက်၆၄ နှစ်အရွယ် မှာ ကွယ်လွန်တယ်တဲ့။ သူနဲ့ကျနော်နဲ့က သက်သူရွယ်တူ တွေ ပါ။ မန္တလေးတက္ကသိုလ်မှာ ကျောင်းနေဖက် တွေပါ။ ရဲဘော်ရဲ ဘက်ပါ။
မန်းတက္ကသိုလ်ကို သူနဲ့ကျနော်တနှစ်တည်းပဲ ရောက် ကြတယ်လို့ ထင်ပါတယ်။ သူရုပ်က တခါမြင်ရင် မေ့မရနိုင်တဲ့ ရုပ်မျိုးပါ။ မျက်လုံးပြူးတာက အထူးထင်ရှားပါတယ်။ မျက်လုံးက ပြူးပြီး စူးရှတောက်ပြောင်တယ်။ နဖူးကျယ်တယ်။ မျက်နှာပုံက ၀ိုင်းဝိုင်းလုံးလုံးပါပဲ။ သံခဲနဲ့ကတော့ မျက်လုံးပဲ နည်းနည်း တူတယ် ထင်ပါတယ်။ အညာသား ပီပီ အသားက တော့ ညိုပါတယ်။
ကိုစိုးဝင်းမောင်က ကျောက်ဆည်ကလာပြီး ကျောင်း တက်တာနဲ့ သူ့ကို ကျောက်ဆည်သားလို့ တချို့က ထင်ကြပေ မဲ့ မဟုတ်ပါ။ သူက ဘုတလင် ဇာတိပါ။ ဥိးသိန်းဖေမြင့်နဲ့ ဖွားရာဇာတိ အတူတူပါပဲ။ ကချေသည် 'ကဗျာ' စာအုပ်နဲ့ အမျိုးသားစာပေဆုရတဲ့ ဘုတလင်ချစ်လေးနဲ့လဲ ဇာတိအတူတူ ပါပဲ။ ဘုတလင် ချစ်လေးကလဲ ဘုတလင်မှာ နေ အခြေချနေ ထိုင်တာမဟုတ်ဘဲ မုံရွာမှာပဲ ကျောင်းဆရာလုပ်နေသူပါ။ ခုတော့ ဘုတလင်သား၊ မန်းတက္ကသိုလ်ကျောင်းသားဟောင်း သုံးဦးလုံး ကွယ်လွန်ခဲ့ကြရှာပါပြီ။
ဘုတလင်သားတွေ၊ ကျနော်သိဖူးသမျှကတော့ စာပေ သမားတွေချည်း ဖြစ်ကြပါတယ်။ ဘုတလင်သား ဦးသိန်း ဖေမြင့်ရဲ့ အရှိန်အ၀ါကြောင့် ပညာတတ်လာရင် စာရေးကြည့် ကြတာ များပါတယ်။ တက္ကသိုလ်ရောက်လာကြရင်လဲ ဦးသိန်းဖေမြင့်လိုပဲ လက်ဝဲသမားတွေ ဖြစ်လာကြလေ့ ရှိပါတယ်။ အနုအရင့်ပဲ ကွာပါတယ်။ တက္ကသိုလ်မှာတော့ ‘တိုးတက် ကျောင်းသား 'တပ်ဦး' ကျောင်းသား တွေလို့ အသိ များကြပါတယ်။
ကျနော်တို့ တက္ကသိုလ်ရောက်ချိန်က တက္ကသိုလ်တွေ မှာ တပ်ဦးနဲ့ ဒီအက်စ်အို ဆိုပြီး အဓိက ကျောင်းသားအဖွဲ့ကြီး နှစ်ဖွဲ့ အားပြိုင်နေပါတယ်။ ကျောင်းသားသမဂ္ဂ ဥက္ကဋ္ဌဟောင်း က တာဝန်ယူ ကျင်းပပေးရပါတယ်။ ရွေးကောက်ပွဲကြီးကြပ်တဲ့ အဖွဲ့မှာတော့ ပါမောက္ခတွေ ချည်းပါပဲ။ ရွေးကောက်ပွဲတိုင်းမှာ တပ်ဦးအဖွဲ့ကပဲ နိုင်မြဲဖြစ်ပါတယ်။ တပ်ဦး ကျောင်းသားတွေကို ကွန်မြူနစ် ဩဇာခံတဲ့။ ဒီအက်စ်အိုအဖွဲ့ကို ဖဆ-ဆိုရှယ်က ဖွဲ့ပေးတဲ့ အဖွဲ့တဲ့။ အဲသလို အပြန်အလှန်ပြောလေ့ရှိပါတယ်။ ကိုစိုးဝင်းမောင်က တပ်ဦးခေါင်းဆောင်ပါ။
မန်းတက္ကသိုလ်ကလောင်ရှင်အသင်း ၁၉၆၀-၆၁ ခုနှစ် အမှုဆောင်အဖွဲ့မှ ကိုစိုးဝင်းမောင်လဲ ပါဝင်ပါတယ်။ သူ့ရဲ့ ကလောင်အမည်က ဘုတလင်ရွှေစိုးတဲ့။ ကလောင်ရှင်အသင်း မှာ သူက ဒုတိယဥက္ကဋ္ဌပါ။ ဥက္ကဋ္ဌက ၀င်ြးွကယ်တဲ့။ အတွင်းရေး မှူးက မောင်စွမ်းရည်ပါ။ ကိုစိုးဝင်းက တိုက်ပုံ အင်္ကျီအမြဲ ၀တ် လေ့ရှိပါတယ်။ အများနဲ့လမ်းမှာဆုံလို့ စကားပြောရင် လက်နှစ် ဖက်နောက်ပစ်ပြီးတော့ ဖြစ်စေ၊ လက်ပိုက်ပြီးတော့ ဖြစ်စေ၊ စကားပြောလေ့ရှိပါတယ်။ စကားပြောရင်လဲ လေးလေးနက် နက်၊ ဖြည်းဖြည်းအေးအေး ပြောလေ့ရှိပါတယ်။ ကျနော်တို့ စကားပြောရင်လဲ သူက အလေးအနက် နားထောင်လေ့ရှိ ပါတယ်။ ဘလွတ် ရွှတ်တောက် ပြောလေ့မရှိပါဘူး။ ပီတိ ကျောင်းဆရာပုံစံပါပဲ။ သူ့သားတွေက ဘုတလင်ရွှေစိုးကို မသိ ပါဘူးတဲ့။
ကိုစိုးဝင်းမောင်က တကယ်လဲ တသက်လုံးကျောင်း ဆရာ လုပ်သွားသူပါ။ ကျောင်းသားဘ၀ကတည်းက ကျောက် ဆည်က အလွတ်ပညာသင်ကျောင်းတကျောင်းမှာ စာပြနေသူ ဖြစ်ပါတယ်။ သူပြတာက သင်္ချာထင်ပါတယ်။ ရန်ကုန်တက္က သိုလ်နဲ့ မန္တလေးတက္ကသိုလ် ကျောင်းသားသမဂ္ဂအမှုဆောင် တွေဟာ အများအားဖြင့် အလွတ်ကျောင်းတွေမှာ စာပြရင်း ကိုယ့်စရိတ်နဲ့ကိုယ် ကျောင်းတက်နေကြသူတွေ များပါတယ်။ ဒါကြောင့်လဲ အစိုးရက အလွတ်ပညာသင်ကျောင်းတွေကို အတိုက်အခံ နိုင်ငံရေးသမား အလောင်းအလျာ ကျောင်းသား တွေရဲ့ သိုက်မြုံအဖြစ် မျက်စိစပါးမွှေးစူးပြီး မျက်လုံးဒေါက် ထောက်ကြည့်စရာ နေရာတွေအဖြစ် အမှတ်ထားလေ့ရှိပါတယ်။ နှိမ်ဖို့အတွက်ကိုလဲ အမြဲချောင်းမြောင်း နေတတ်ပါတယ်။
ဒါကြောင့် ကျောင်းသားခေါင်းဆောင်တယောက် ယောက်ကို ရှာချင်ရင် သူသွားနေကျ အလွတ်ပညာသင်ကျောင်း တကျောင်းကိုပဲ ဖြစ်ဖြစ်၊ မဂ္ဂဇင်းတိုက်တတိုက်ကိုပဲ ဖြစ်ဖြစ် လိုက်ရှာရပါတယ်။ ကျောင်းသားခေါင်းဆောင် တော်တော် များများကလဲ ကလောင်သွေးနေတဲ့ စာရေးဆရာ ဒါမှမဟုတ် သတင်းစာ ဆရာဖြစ်နေတတ်တာလဲ ခေတ်ရဲ့ လက္ခဏာ တခု ပါပဲ။
ကိုစိုးဝင်းမောင်ဟာ ကလောင်သွေးနေတဲ့ ကျောင်း သားတယောက် ဖြစ်သလို ကျူရှင်ဆရာတဦးလဲဖြစ်တဲ့အတွက် သူကပဲ အပေါင်းအသင်းတွေကို လက်ဖက်ရည် တိုက်လေ့ ရှိပါတယ်။ သူက ကျနော်တို့ ကလောင်ရှင်တွေကိုတော့ အထူးခင်မင်ပါတယ်။ ကျနော်တို့ ဆိုတာက တင်မိုး၊ ကြည် အောင်၊ မောင်သိန်းနိုင်၊ မောင်စွမ်းရည်တို့ အုပ်စုကို ဆိုလို ပါတယ်။ အဲဒီနှစ်တွေမှာ အတူရောက်လာကြတဲ့ တောသား အုပ်စု ဖြစ်ပါတယ်။ ဒါ့ကြောင့် သူတို့က အထူးကြည့်ရှုစောင့် ရှောက်တဲ့ သဘောလဲ ပါပါတယ်။
ကိုစိုးဝင်းမောင်က ကျောင်းဆရာတိုက်ဆိုတော့ နည်း နည်းလူကြီးရုပ် ပေါက်ပါတယ်။ တကယ်တော့ သက်တူရွယ်တူ တွေချည်းပါပဲ။ တက္ကသိုလ်မှာ သူယူတဲ့ ဘာသာတွဲက 'ပျူးဝါး ဆိုင်းရင့်' လို့ခေါ်တဲ့ သိပ္ပံဘာသာတွဲ ဖြစ်ပုံရပါတယ်။ ၀ိဇ္ဇာတွဲ တွေဖြစ်ကြတဲ့ မောင်သိန်းနိုင်၊ မောင်ဘဂျမ်း (တင်မိုး) တို့နဲ့လဲ အတူ အတန်းတက်လေ့မရှိသလို၊ ဘူမိဗေဒ၊ ဇီဝဗေဒသမား တွေတက်လေ့ရှိတဲ့ ဖက်ကိုလဲ လာတာ မတွေပဖူးခဲ့ပါဘူး။ ကျောင်းတက်နည်းလို့လဲ ဖြစ်ချင်ဖြစ်ပါမယ်။
စစ်အစိုးရတက်တော့ ကျနော်တို့ အများစုက အပြင်မှာ အလွတ်ကျောင်းဆရာတွေ လုပ်နေကြပါတယ်။ အဲဒီအခါ ကိုစိုးဝင်းမောင်နဲ့ အတူ မြင်းခြံလေးမောင်နဲ့ ကြည်အောင်တို့ ကျန်ရစ်ပါတယ်။ မြင်းခြံက ဗကသ ခေါင်းဆောင် ကိုအောင်သူကလဲ တင်မိုးနဲ့ ၀င်းကြွယ်တို့နှစ်ဦး ညှပ်ပြီး စာသင်ပေးလိုက်လို့ ဆယ်တန်းအောင်ပြီး တက္ကသိုလ် ရောက်လာတယ်။ ဖိုးသံချောင်း (လူထု)လဲ တက္ကသိုလ် ရောက်လာတယ်။
လူသစ် လူဟောင်းတွေတွဲပြီး ကျောင်းသား သမဂ္ဂ၊ ကျောင်းသား ညီညွတ်ရေးတပ်ဦးနဲ့ ကလောင်ရှင်အသင်းတို့မှာ ၀င်ရောက်တာဝန်ယူကြပါတယ်။ ကိုစိုးဝင်းမောင်၊ ကိုအောင်သူ၊ ကိုဖိုးသံချောင်းတို့က တကသ၊ ကြည်မောင်နဲ့ လေးနွယ်တို့က ဗကသမှာ တာဝန်ယူကြတယ် ထင်ပါတယ်။ ကျနော်တို့ ကျောင်းမှာ ကိုစိုးဝင်းမောင်နဲ့ တွဲနေကြတုံးက၊ ကြည်အောင်နဲ့ ကိုစိုးဝင်းမောင်တို့ သိပ်ရင်းနှီးခဲ့ပုံ မရပါဘူး။ နောက်ကျတော့ ကျနော်တို့နဲ့ ရင်းနှီးတာထက် သူတို့ချင်းရင်းနှီးမှုက ပိုတယ် ထင်ပါတယ်။ 'တိုက်ပွဲ' က တွဲပေးလိုက်ပုံ ရပါတယ်။
ပြည်တွင်းငြိမ်းချမ်းရေးဆွေးနွေးပွဲ (၁၉၆၃) ပျက်သွား တော့ အားလုံးလဲ စကောထဲ ဇီးဖြူ လှိမ့်သလို ဖရိုဖရဲလွင့် ကုန်ကြပါတယ်။ ကိုသာနိုး၊ ကိုသိန်းနိုင်၊ ကိုတင်မိုး၊ ကိုဝင်းဖေ၊ မောင်မိုးသူ၊ မိုးကြည်စတဲ့၊ မန္တလေးစာပေအနုပညာအသိုင်း အ၀ိုင်းက လူတော်တော် များကလဲ ရန်ကုန်ဆင်းသွားကြတယ်။ ကျန်ရစ်သူတွေထဲက ကျွန်းရောက်၊ ထောင်ရောက်၊ တော ရောက်၊ တောင်ရောက်- ရောက်သူတွေလဲ အများကြီးပါပဲ။ လူစု ကွဲသွားကြပါတယ်။ ကျနော်လဲ မန္တလေးမှာ အလွတ်ကျောင်း ဆရာ လုပ်နေရာက ကျောင်းကို ပြည်သူပိုင် သိမ်းလိုက်တော့ အစိုးရကျောင်းဆရာ ဖြစ်သွားခဲ့ပါတယ်။
အဲဒီတုန်းက မန္တလေးမှာ စာပေအနုပညာသည်တွေ အတွက် အလေးထားရာ၊ စုဝေးရာ အဖြစ် လူထုသတင်းစာတိုက် ပဲ ရှိပါတယ်။ လူထုသတင်းစာတိုက်ကိုလဲ စစ်အစိုးရက ၁၉၆၇ ခုနှစ် ပိတ်ပစ်လိုက်ပါတယ်။ ကျနော်တို့မှာ လွတ်လွတ်လပ်လပ် လုပ်လို့ရတဲ့ အလွတ်ကျောင်းဆရာလဲ လုပ်လို့ မရတော့။ အလွတ်သတင်းစာဆရာလဲ လုပ်လို့မရတော့။ ကျနော်တို့ လုပ်တတ်တဲ့ အလုပ်နှစ်ခုလုံး အစိုးရအလုပ်တွေဖြစ်ကုန် ကြပါတယ်။ မန္တလေးမှာက စာနယ်ဇင်းတိုက် လုံးဝမရှိတော့တဲ့ အတွက် ကျနော်လဲ အပေါင်းအသင်းတွေရှိရာ ရန်ကုန်ကို စုန်ဆင်းလာခဲ့ပါတော့တယ်။
အလွတ်ကျောင်းတွေကို ၁၉၆၅ - ၆၆ လောက်မှာ စစ်အစိုးရက ပြည်သူပိုင်သိမ်းလိုက်ပါတယ်။ ဆက်ပြီးအလုပ် လုပ်ချင်တဲ့ ဆရာတွေ အားလုံး အစိုးရကျောင်းဆရာတွေ ဖြစ်ကုန်ပါတယ်။ ကျနော်လဲ ကျောင်းသုံးစာအုပ်အဖွဲ့မှာ အလုပ်လုပ်ဖို့ကို ရန်ကုန်ကို အကြောင်းရှာပြီး ဆင်းခဲ့ခြင်းပါ။ ရန်ကုန်ဆင်းကြတဲ့ အထဲမှာ ကျနော်က နောက်ဆုံးဖြစ်မယ် ထင် ပါတယ်။ ကိုစိုးဝင်းမောင်လဲ ဘယ်ရောက်နေမှန်း မသိတော့ ပါဘူး။
ကျနော်ရန်ကုန်ရောက်တော့ သမိုင်းသင်ရိုးအဖွဲ့နဲ့ မြန်မာစာသမိုင်း အဖွဲ့တို့မှာ လုပ်ပါတယ်။ သင်ရိုးအဖွဲ့ဝင် တွေဟာ စာမေးပွဲ စစ်ခွင့်ရှိပါတယ်။ နှစ်စဉ် ၁၀ တန်းစာမေးပွဲ စစ်ချိန်မှာ ငယ်သူငယ်ချင်းတွေနဲ့ ပြန်ဆုံလေ့ရှိပါတယ်။ ခုတော့ စာမေးပွဲ စစ်တာကိုလဲ လူစုခွဲပစ်လိုက်တယ်လို့ ကြားရပါတယ်။ ကျနော်အလုပ်လုပ်တဲ့ မြန်မာစာသင်ရိုးအဖွဲ့ကို ပညာရေးရုံး ရယ်လို့ သီးခြားမရှိခင်မှာ တက္ကသိုလ် မြန်မာစာဌာန၊ တောင်ငူ ဆောင်မှာ ထားပါတယ်။
မြန်မာစာပါမောက္ခတွေက _ ဦးဘိုသင်းတို့၊ ဒေါ်စီစီဝင်းတို့ပါ။ ကျနော်က သင်ရိုးအဖွဲ့ဝင်၊ နောက်တော့ သင်ရိုးအတွင်းရေးမှူးတာဝန်ထမ်းဆောင်ရင်း မြန်မာစာဌာနမှာပဲ ရုံးတက်ရပါတယ်။ အဲဒီမှာ အထက်တန်းကျောင်းတုန်းက သူငယ်ချင်းတွေရော၊ မန္တလေးတက္ကသိုလ်က သူငယ်ချင်း တွေရော ပြန်ဆုံကြပြီး လက်ဖက်ရည်ဆိုင်မှာ ထိုင်ကြတာများ ပါတယ်။
ပြန်လည် ဆုံတွေ့ကြသူတွေထဲမှာ ကိုစိုးဝင်းမောင်လဲ ပါလာလို့ ကိုသာနိုး၊ ကိုတင်မိုး၊ မောင်မိုးသူ - စတဲ့ သူငယ်ချင်း ဟောင်းတွေနဲ့ ၀ိုင်းဖွဲ့လေ့ရှိ ကြပါတယ်။ အများအားဖြင့် နေ့လည် ထမင်းစားချိန်မှာ ဆုံကြပါတယ်။ ရှေးဟောင်း နှောင်းဖြစ်တွေ ပြောကြရင်း အလွမ်းသယ်ကြပါတယ်။
နောက်များမကြာခင် သူရော ကျနော်ရော အငြိမ်းစား ယူကြလို့လား မသိ၊ မဆုံကြရဘူး။ ဒါပေမဲ့ အမေလူထု ဒေါ်အ မာရဲ့ မွေးနေ့သွားကြရင် လေထီးဦးအုန်းမောင်၊ သခင်အုန်းမြင့်၊ စတဲ့ ရှေးဟောင်း နိုင်ငံရေးသမားကြီးတွေက ကျောက်ဆည် ဒေါ်မြရီအိမ်ကို ၀င်လေ့ရှိတယ်။ ကျနော်တို့လဲ လိုက်ကြတယ်။ ဒေါ်မြရီခြေကျိုးနေလို့ အမေဒေါ်အမာရဲ့ မွေးနေ့ကို မလာနိုင်တဲ့ အချိန်ပိုင်းအတွင်းကပါ။ ဒေါ်မြရီဆိုတာ ကျောက် ဆည်သခင်တင်ရွှေရဲ့ ဇနီးပါ။ ဦးသိန်းဖေမြင့် ခေါင်းဆောင်ပြီး အိန္ဒိယပြည်မှာ ဖက်ဆစ်တော်လှန်ရေးအတွက် ပြင်ဆင်ကြတော့ လေထီးသင်တန်းကို လူ ၇၀ - ၈၀ ခေါ်ရာမှာ အမျိုးသမီးအနေနဲ့ ဒေါ်မြရီတယောက်လဲ ပါခဲ့ပါတယ်။ အိန္ဒိယမှာ အတူနေခဲ့ရတဲ့ လေထီးဦးအုန်းမောင်နဲ့ နိုင်ငံရေး ရဲဘော်ဟောင်းများက ဒေါ်မြရီကို ၀င်ရောက်နှုတ်ဆက်ကြတဲ့ အခါ ကျနော်က ကိုစိုး ၀င်းမောင်ကိုပဲ စုံစမ်းပါတယ်။ ဒါပေမဲ့ မတွေ့ခဲ့ ရပါ။
မောင်မိုးသူနဲ့ ကျနော် မန္တလေးကို ၂၀၀၀ ပြည့်နှစ် ရှေ့ပိုင်းမှာ စာပေကိစ္စတခုနဲ့ ရောက်သွားတော့ ကဗျာဆရာ ကြည်အောင်နဲ့ ကိုလေးတို့ အင်းဝညီနောင်နှစ်ဦး လာတွေ့ ပါတယ်။
“ဒီနေ့ ငါတို့ကျောက်ဆည်ကို လူမမာမေးသွားမယ်။ မင်းတို့လဲ လိုက်ခဲ့။ ငါတို့ရဲဘော်ကြီးစိုးဝင်းမောင် ကင်ဆာ ဖြစ်နေလို့တဲ့။ အဲဒါသွားမေးကြရအောင် -” လို့ ကြည်အောင်က ကျနော်တို့ကို ဖိတ်ခေါ်ပါတယ်။ ကျနော်တို့က သူများဖိတ်ကြား ထားတဲ့ကိစ္စနဲ့မို့ ကြည်အောင်ခေါ်ရာကို မလိုက်နိုင်ခဲ့ပါ။
ကိုစိုးဝင်းမောင်လဲ ချက်ချင်း ခုလိုဖိတ်စဉ်သွားမယ်လို့ မထင်ခဲ့ပါ။ ၂၀၀၀ ပြည့်နှစ်ကုန်မှာပဲ ကိုစိုးဝင်းမောင်တယောက် ဆုံးရှာပြီလို့ သတင်းကြားလိုက်ရပါတယ်။ ကျနော်တို့မှာလဲ အိမ်နေရာ ဖယ်ရှားပေးရမယ်ဆိုတဲ့ အမိန့်ကြောင့် အစိုးရနဲ့ ထိပ် တိုက်ဖြစ်နေတဲ့အတွက် သူငယ်ချင်းရဲ့ နာရေး ကိစ္စသွားဖို့ ပျက် ကွက်ခဲ့ပါတယ်။ ဒါ့ကြောင့် စိတ်မကောင်းဖြစ်ခဲ့ ရပါတယ်။
ပြည်ပကိုရောက်လာတော့ ကိုစိုးဝင်းမောင် ရဲ့သား တယောက် ဖြစ်တဲ့ ကိုသံခဲနဲ့ ဆက်သွယ်မိပါတယ်။ အသုဘ မှတ်တမ်းဓါတ်ပြားရှိလားဆိုလို့ လှမ်းတောင်းတော့ လက်ဆင့် ကမ်းရင်းနဲ့ ၂၀၀၇ ခုနှစ်ကျမှ ကိုဘဂျမ်း (တင်မိုး) အိမ်ကို ကျ နော်ရောက်နေချိန် လက်ခံရရှိပါတယ်။ ကိုစိုးဝင်းမောင်ရဲ့ အသုဘသတင်းကားကို တင်မိုးနဲ့ ကျနော် အတူကြည့် ကြပါတယ်။ ကြည်အောင်နဲ့ ကိုလေးတို့ပါသလားလို့ ကြည့်ပါ တယ်။ သူတို့အဖမ်းခံနေရတုန်းနဲ့ တူပါတယ်။ မတွေ့ပါ။ အတော်ရုပ်ပြောင်းနေတဲ့ သူငယ်ချင်းတချို့ကို မြင်လိုက် ပါတယ်။
ကိုစိုးဝင်းမောင်ရယ်၊ သူနဲ့အတူတွဲခဲ့ကြတဲ့ မြင်းခြံက အောင်သူရယ်၊ လေးမောင်ရယ် - သုံးယောက်လုံး စာပေ သမားတွေ ချည်းပါပဲ။ စာရေးကောင်းကြသူတွေ ချည်းပါပဲ။ ခေတ်ဆိုးကြီးကို ကြမ်းကြမ်းရမ်းရမ်း မဖြတ်သန်းကြရရင်တော့ သူတို့လဲ ကျနော်တို့နဲ့အတူ စာပေစင်မြင့်ပေါ်မှာ အတူရှိနေ ခဲ့ကြမှာပါ။ ကျနော်တို့က အိမ်စောင့်အစိုးရနဲ့ ထိပ်တိုက်ဖြစ် ခဲ့ရတာပါ။ သူတို့က စစ်ဦးဘီလူးအစိုးရနဲ့ ထိပ်တိုက်ရင်ဆိုင်ဖို့ တက္ကသိုလ်မှာ ကျန်ရစ်နေသူတွေပါ။
ကွယ်လွန်သူရဲဘော် စိုးဝင်းမောင်ကို ဒီဆောင်းပါးနဲ့ အမှတ်တရ အလေးပြုလိုက်ပါတယ်။
(မောင်စွမ်းရည် - ၂၀၀၉၊ မတ် ၁၉)
No comments:
Post a Comment