Saturday, March 28, 2009

ကဗျာဆရာ ကြည်အောင် (၁၉၃၇ - ၂၀၀၉ ) ကွယ်လွန်

ကဗျာဆရာ ကြည်အောင် (၁၉၃၇ - ၂၀၀၉ ) ကွယ်လွန်

မိုးမခ

မတ် ၂၇၊ ၂၀၀၉
မြန်မာပြည်ဒီမိုကရေစီရေးနှင့် စာပေလွတ်လပ်ခွင့်တို့အတွက် ရဲရဲရင့်ရင့်ရပ်တည်သူ၊ ဒေါ်အောင်ဆန်းစုကြည်ဦးဆောင်သော အမျိုးသာဒီမိုကရေစီအဖွဲ့ချုပ်၏ စာပေဟောပြောပွဲများနှင့် စာပေလှုပ်ရှားမှုများကို စဉ်ဆက်တစိုက် အားပေးဆောင်ရွက်သူ၊ စစ်အစိုးရ၏ မျက်မုန်းကျိူးခြင်းခံပြီး ပြည်တွင်းတွင် စာပေရေးသားခြင်း ဟန့်တားပိတ်ပင်းခြင်းခံရသူ မြန်မာကဗျာစာဆိုတဦးဖြစ်သူ (ဦး) ကြည်အောင်သည် မန္တလေးအချိန် ၂၇၊ မတ်လ ၂၀၀၉ နေ့ နံနက်အရုဏ်တက်ချိန် နှလုံးရောဂါဖြင် ကွယ်လွန်ကြောင်း သတင်းရရှိပါသည်။

ကဗျာဆရာ တင်မိုး၊ ကဗျာဆရာ မောင်စွမ်းရည်၊ စာရေးဆရာ မောင်သာနိုး၊ မြန်မာစာဆရာ ဂုဏ်ထူးသိန်းနိုင်တို့နှင့် မန္တလေးတက္ကသိုလ် (၁၉၅၆ - ၆၃) ၀န်းကျင်က ခေတ်ပြိုင်ကဗျာဆရာတဦးအဖြစ် ထင်ရှားသူဖြစ်သည်။ ၁၉၈၈ အရေးတော်ပုံနောက်ပိုင်း ကဗျာဆရာ ကိုလေး (အင်းဝဂုဏ်ရည်)နှင့် တွဲ၍ အင်န်အယ်လ်ဒီပါတီ၏ စာပေဟောပြောပွဲများ၊ စာပေလှုပ်ရှားမှုများတွင် ဆောင်ရွက်သူအဖြစ် တွေ့ရသည်။

အမေရိကန်ပြည်ရောက် ကဗျာဆရာမောင်စွမ်းရည်က

“ကျနော်တို့ မန္တလေးတက္ကသိုလ်က အဲဒီအချိန်တုန်းက တက္ကသိုလ်ဝမ်းကြာတိုက်က မွေးဖွားလိုက်တဲ့ ကဗျာညီအကိုတွေ၊ အမွှာတွေလိုမျိုး ပြောကြတယ်။ တင်မိုး၊ မောင်စွမ်းရည်နဲ့ ကြည်အောင်ပေါ့။ ပြီးတော့ မောင်စွမ်းရည်နဲ့ ကြည်အောင်ကတော့ “စိတြ” ကဗျာစာအုပ်ကို တွဲပြီး ထုတ်ဝေခဲ့တယ်။ ကျနော် ဖုံးဆက်တယ်။ ခုထိ မရသေးဘူး။ ပြီးတော့ မှတ်မှတ်ရရ ဒီ မတ်လ ၂၇ ဆိုတာက ဂုဏ်ထူးသိန်းနိုင်ရဲ့ မွေးနေ့ပွဲပြုနေကြနေ့ဖြစ်တယ်။ ဒါပေမယ့်အခုတော့ နောက်တဦးရဲ့ သေနေ့ ဖြစ်သွားပြီ။ ကဗျာဆရာ ကြည်အောင်ရဲ့ သေနေ့ပေါ့ဗျာ …”

ဟု ပြောကြားသည်။

ကဗျာဆရာ (ဦး) ကြည်အောင် ရေးသားခဲ့သည် ဒေါ်အောင်ဆန်းစုကြည် အသက်ရာကျော်ရှည်စေဖို့ တောင်းဆုကဗျာကို မိုးမခမှာ မကြာခင်က ထည့်သွင်းခဲ့ဘူးသည်။ ယခုသည်ကဗျာကို ဆရာကွယ်လွန်ခြင်း ၀မ်းနည်းခြင်း အမှတ်တရ ပြန်လည်ဖော်ပြလိုက်ပါသည်။ မိုးမခက နှုတ်ဆက်နေကြစကားအတိုင်း နှုတ်ဆက်လိုက်ပါသည်။

“ကဗျာဆရာ ကြည်အောင်ကား ကွယ်လေပြီ။ ကဗျာဆရာ ကြည်အောင် သက်တော်ရာကျော် ရှည်ပါစေသတည်း”



အောင်ဆန်းစုကြည်ရဲ့ခေတ်
ကြည်အောင်

အောင် နိမိန်ပန်း
ဆန်း ရဲ့သတ္တိ
စု မိပေါင်းရုံး
ကြည် ပြုံးရွှင်ပျော်
ခေတ် သစ်မျှော်စို့ ...

ဟုတ်သပ့ါ
ကျုပ်နှမ
မုချ
အသက်ရာကျော် ရှည်မှာမို့ ...

ကြည်အောင် (၁၉၃၇ - ၂၀၀၉)

အင်းဝ ဇာတိ၊ အဖ ဦးစိန်ညွန့်၊ အမိ ဒေါ်ထွေး တို့က ၁၉၃၇ ခုနှစ်၊ ဖေဖော်ဝါရီ ၂၇ ရက်နေ့တွင် မွေးဖွားသည်။ အမည်ရင်းမှာ ကြည်လင် ဖြစ်ပြီး၊ မော်ကွန်း ဘုန်းကြီးကျောင်း၊ တံတာဦး အထက၊ မန္တလေးတက္ကသိုလ် တို့မှာ ပညာ သင်ကြားခဲ့သည်။

၁၉၅၈ - ၅၉ မန္တလေး တက္ကသိုလ် နှစ်လည် မဂ္ဂဇင်း အင်္ဂလိပ်စာ စာတည်း၊ မန္တလေး တက္ကသိုလ် ကလောင်ရှင် အသင်း အတွင်းရေးမှူး၊ ၁၉၆ဝ - ၆၁ မှာ မန္တလေးတက္ကသိုလ် နှစ်လည် မဂ္ဂဇင်း မြန်စာ စာတည်း စတဲ့ တာဝန် တွေကို ယူခဲ့သည်။

မန္တလေး လူထု သတင်းစာ၊ ရှုမဝ၊ ငွေတာရီ စတဲ့ မဂ္ဂဇင်း တွေမှာ ကဗျာ၊ စာပေ ဝေဖန်ရေး ဆောင်းပါးတွေ ရေးသားရင် “ကြည်အောင်” ကလောင် အမည်ကို တည်ဆောက် ခဲ့သည်။

၁၉၅၉ ခု၊ ရှုမဝ မဂ္ဂဇင်းပါ “ဖြစ်အင်” ကဗျာဟာ ပထမဆုံး ပုံနှိပ် ဖော်ပြခဲ့တဲ့ စာမူ ဖြစ်သည်။ ၁၉၆၃ မှာ “လမင်းတရာ” ကဗျာ စာအုပ်နဲ့ အမျိုးသား စာပေဆု ရခဲ့သည်။ မောင်စွမ်းရည်နဲ့ တွဲပြီး စိတြ (၁၉၆ဝ)၊ ဒုဋ္ဌဝတီမှ ဧရာဝတီသို့ (၁၉၆၅)၊ မိခင် မာရသွန်၊ ဟေမန္တ ခြေမြန်တော် (၁၉၉၁)၊ နှင်းဆီခင်းပေါ်က လမင်း (၁၉၉၄) စတဲ့ ကဗျာ စာအုပ် တွေနဲ့ သစ္စာရှာဖို့ ငါ မြင်းစီးမယ် (၁၉၉ဝ) စကားပြေ စာအုပ်လည်း ထုတ်ဝေပြီး ဖြစ်သည်။

မိုးမခ မှ ကူးယူဖေါ်ပြပါသည်။

No comments: